Hemligheten med att kunna vara i en isvak en längre stund är att andas lugnt. Hannes Olofsson vet. Foto. Isak Påve
Salasuus ette saattaa olla avenossa pitemän aikaa oon ette henkiä lyngnisti. Hannes Olofsson tietää. Valokuva: Isak Påve
Instakrammissa met saatama seurata Lannavaaran-asukasta Hannes Olofssonia ko se uipi avenossa ja nauttii kylmästä pohjosessa. Met tahoma Hanneksen selittämhään sen innosta ja antamhaan tipsiä muile jokka yhtyvä talvipaatitrenthiin.
27-vuotias Hannes oon kasunu ylös Lannavaarassa ja assuu jäljelä sielä.
– Mie olen aina ollu vesielävä ja tykäny paataamisesta, siittä asti ko olin pieni. Usseen se oon ollu ulkona ko ei ole olllu uimahallia lähelä.
Hannes paatasi ensi kerran oikeen kylmässä 2020 Lannavaarassa ko järvi oli justhiins riittonu. Ennen sitä se oli kylmäkylpöny monta kertaa. Hannes oon ei-pinääri transhenkilö ja halvaa käyttää pronoomenia ”se” ittestä, se ei tunnusta ittensä miehenä eli vaimona.
Tänä talvena se päätti ottaa paati-innon askelta eemäs. Yhessä serkku Isak Påven kans Hannes teki avenon järhveen.
– Se oon ensi kerta ko met olema sahahnee täälä Lannavaarassa ko se oon vähän hankala mennä Ahvenjärvele missä oon meän paatipaikka kesilä.
Järvele meno vaatii skuutteria piilitietä ei pluuata talvela.
Jääporila serkut tehit reijän jäähän. Sitten tuli lapio ja jääkanki etheen, ette saa avenon kylliksi isoksi.
Net laskit trapun pohjaan ette kätevästi saattaa mennä ylös ja alas. Veensyvvyys oli suunile meeterin, Hannekselle vyötärhöön.
Miksis jääpaati oon niin ihana?
– Se tuntuu niin somalta jälkhiin, ko oon saanu kokea kropan järkytyksen ko se puotethaan kylhmään vetheen. Mutta mulle se oon hauska haaste ette yrittää maaluttaa pylsin, ette henkiä lyngnisti ja tulla lyngni itteki.
– Mie tykkään atrenaliinipotkusta mikä tullee jälimyttäin ko oon tullu jään pääle – sillon se tuntuu ette halvaa takasi aventhoon.
Mutta oonhaan riskiä ette tullee hätä?
– Joo, oon hyvin helppo, olen kokenu sen monta kertaa ette pylsi oon nossu ja hengitys oon tullu äkki. Se vaatii ette yrittää hengittää syvästi ja pysyttää rauhan. Nyt oon paljon parempi mulle ko alussa, ette se oon harjotusasia.
Hannes pruukaa maata avenossa jonku minutin, mutta aika vaihtelee.
– Ko sie paataat kahenkymmenen astheen pakkasessa sie et ole veessä yhtä kauon ko muuten. Veessä oon sillon suunile kolme astetta.
Kunkas olis ollu sauna jälkhiin?
– Se olis ollu mahottoman ihana jos olis ollu sauna. Meilä pruukaava olla porontaljat matkassa minkä päälä seisoo, ja kätevästi saa vaatheet pääle.
– Meilä oon kans lämmintä juomaa matkassa ette lämmitä sisältä päin. Met emmä halva olla kylmät ko met ajama skuutterilla kotia.
Hannes oon päättäny paatata ulkona 100 kertaa 2022. Viimi vuona se teki sen 72 kertaa ja siihen kuulu kans uiminen kesälä. Aventouimista tullee suunile kerran kuukauessa.
Tipsiä muile joila oon talviuimishalu?
- Sie saatat harjotella kylmilä suihkuila ja harjottaa kropan vähän kertaa kylmäle.
- Jos sie uit avenossa sulla pittää aina olla joku matkassa, se oon hauskempi ja varmempi
- Katto kans ette oon helppo mennä ylös ja alas aventhoon.
- Ota lämmintä juomaa ja jotaki joka säilyttää lämpimän, minkä päälä sie saatat seisoa. Usseimin sulla palelee jalkoja ja käsiä (ko sulla oon kylmä).
Hannes ja sen serkku oon puhuhnee vähäsen siittä ette puota vetheen vahinkossa talvenaikana.
– Mulle ja Isakille tuntuu ette olis vähän turvalisempi nyt jos met häätysimmä olla jääkylmässä veessä pitemän aikaa. Methään olema harjotelhee ette ei tule paniikki.
Susanne Redebo
FAKTA
Hannes Olofsson, 27 vuotta
Assuu: Lannavaarassa Kierunan ulkopuolela
Tekkee: Pittää luentoja ette olla ei- pinäärinen (ei tunnusta ittensä vaimona eli miehenä) ja kaikkiin samasta arvosta.
Tunnettu ette: Oon tehny työtä ette topata alaspanemisen transhoijosta Uumajassa.
Instagramkonto: @livetsomhannes
Susanne Redebo
